Fekk
monsterlange med forviklingar
Dette er rett og slett ei utruleg
fiskehistorie som involverer fleire sportsfiskarar, avansert fiskereiskap og ei
kjempestor lange på 26 kilo. Då den norske fiskar fekk ruggen opp i båten ein
sur dag i haustferien, viste det seg at fisken hadde stukke av med
fiskereiskapen til ein annan sportsfiskar.
– Me drog tungt og kjende kraftige rykk i snøret. Fisken prøvde å dra av
garde. Etter nokre minutt med intens spenning, vart vinkelen på snøret skråare
og skråare og plutseleg vart snøret heilt slakt. Femti meter borte duva ei
diger kvit buk i bølgjene. Me gjorde store auge då me kom bort til fisken og
fekk sjå storleiken. Utan klepp fomla me noko med å få beistet opp i båten.
Fisken var solid vikla inn i sniksnøret. I kjeften på beistet hang to krokar
med gamle agnrestar og ein tung pilk. Sniksnøret hadde vikla seg inn i desse.
Til vår store forundring oppdaga me at ingen av krokane i kjeften på dyret høyrde
til vårt sniksnøre. Me hadde med andre ord ikkje krokfeste på fisken, så det
er heilt utruleg at me fekk han opp, seier Søfteland. No lurar han på kven som
har hatt storfisken på kroken tidlegare.
Den norske sportsfiskar fekk ei lange på 26 kilo på sniksnøre utanfor Våge.
Langa hadde pilk og fiskekrokar festa i kjeften etter at ein annan sportsfiskar
har prøvd seg på beisteet tidlegare.
Fiskeguide var først på langa
Michael Naunheim, fiskeguide på Tysnes Sjø og Fritid, vart ganske så
overraska då han las bladet Tysnes i førre veke. På den store langa, som den
norske sportsfiskaren hadde teke på sniksnøre den 15. oktober, hang
nemleg Naunheim sin fortaum med pilk og anglar.
Det var den 12. oktober at han og fleire sportsfiskarar var ute ved Seiafluene
utanfor Våge. To dagar før hadde fiskeguiden halt opp ei lange på 168 cm. No
hadde han storfisk på kroken att.
– Eg skjøna at eg hadde storfisk på stanga, og trudde at eg skulle setja ny
personleg rekord. Eg fekk vel drege han opp ein 30 meter, men så rauk snøret,
seier Naunheim. Den personlege rekorden hans er ei lange på 174 cm.
– Eg trudde at fisken eg miste var endå større, truleg på grunn av at det
var kraftig vind. Når du mister noko så stort, er det utruleg keisamt, seier
Naunheim.
Berre tre dagar etter denne hendinga vart den grådige langa lokka av sniksnøret
til den norske sportsfiskar. Med pilk og to anglar festa i kjeften, vikla han
seg inn i sniksnøret til Søfteland og drog heile snøret med seg midtfjords i
Bjørnefjorden. Det var med naud og neppe at han fann det att, og då han fekk
ruggen på land viste vekta 26 kilo og langa vart målt til 167 cm.
(ifra Bladet Tysnes)
